كاستامونۋ قالاسىندا «ماعجان جۇمابايەۆ جىلى" سالتاناتتى تۇردە  اشىلدى، دەپ حابارلايدى Qamshy.kz اقپارات اگەنتتىگى.

تۇركسوي-عا مۇشە ەلدەردىڭ وكىلدەرى بيىل تۇركيانىڭ كاستامونۋ شاھارىندا باس قوستى. وندا «كاستامونۋ – 2018 جىلعى تۇركى الەمىنىڭ مادەني استاناسى» جىلى اياسىندا قازاق ادەبيەتىنىڭ جارقىن جۇلدىزى، اقىن ماعجان جۇمابايەۆ جىلىنىڭ سالتاناتتى اشىلۋى ءوتتى.

تۇركسوي ۇيىمىنىڭ 2018 جىلعى ءىس-شارالار جوسپارىنا سايكەس، تۇركيادا قازاق اقىنى ماعجان جۇمابايەۆتىڭ 125 جىلدىق مەرەيتويىمەن قاتار، ءازىربايجان رەسپۋبليكاسىنىڭ اتاقتى كومپوزيتورى كارا كارايەۆ پەن قىرعىزدىڭ كورنەكتى جازۋشىسى شىڭعىس ايتماتوۆتى ەسكە الۋ  جىلى دەپ جاريالانعان.

شاراعا تۇركسوي حالىقارالىق ۇيىمىنىڭ باس حاتشىسى دۇيسەن قاسەيىنوۆ، تۇركيانىڭ مادەنيەت جانە تۋريزم ءمينيسترىنىڭ ورىنباسارى حۋسەين يايمان، كاستامونۋ قالاسىنىڭ گۋبەرناتورى ياشار كارادەنيز، كاستامونۋ قالاسىنىڭ باسشىسى تاحسين باباش جانە تۇركيا قالالارىنداعى گۋبەرناتورلار مەن اكىمدەر، تۇركى ەلدەرىنىڭ وكىلدەرى مەن ماعجان جۇمابايەۆ  تۋعان سولتۇستىك قازاقستان وبلىسىنىڭ مادەنيەت قىزمەتكەرلەرى جانە قازاقستاندىق اقىن-جازۋشىلار قاتىستى.

تۋعانىنا 125 جىل تولعان ايبىندى اقىندى ءبىر مينۋتتىق ۇنسىزدىكپەن ەسكە العان تۇركى جۇرتى ونىڭ عۇمىرى مەن شىعارمالارىنان سىر شەرتەر بەينەفيلمدى جانە سولتۇستىك قازاقستان وبلىسى ونەرپازدارى دايىنداعان كونسەرتتىك باعدارلامانى تاماشالادى. سونداي-اق تۇركيانىڭ مادەنيەت جانە تۋريزم ءمينيسترىنىڭ ورىنباسارى حۋسەين يايمان ماعجان جۇمابايەۆتىڭ ولەڭدەرىن جاتقا وقىپ، كوپتىڭ قۇرمەتىنە بولەندى. ايتا كەتەرلىگى، ماعجان ولەڭدەرى تۇرىك تىلىنە اۋدارىلىپ، كىتاپ بولىپ باسىلىپ شىققان.

«اتاۋلى جىل اياسىندا جەلتوقسان ايىنا دەيىن كوپتەگەن ءىس-شارالار مەن ءتۇرلى كەزدەسۋلەر وتكىزىلەتىن بولادى. ماعجان جۇمابايەۆ جىلىنا ارنالعان ارنايى باعدارلامالار تەك كاستامونۋ قالاسىندا عانا ەمەس، تۇركياعا قاراستى باسقا قالالاردا دا ۇيىمداستىرىلادى» – دەيدى تۇركسوي ۇيىمىنىڭ باس حاتشىسى دۇيسەن قاسەيىنوۆ.

ەستەرىڭىزگە سالا كەتسەك، تۇركسوي-عا مۇشە ەلدەردىڭ مادەنيەت مينيسترلەرىنىڭ تۇركىستان قالاسىندا وتكەن حححV تۇراقتى كەڭەسى وتىرىسىندا تۇركى ەلدەرىنىڭ 2018 جىلعى مادەني استاناسى دەپ كاستامونۋ قالاسى بەكىتىلگەن بولاتىن. وسى ورايدا، 50-دەن اسا ءىس-شارالاردى وتكىزۋ جوسپارعا الىنعان. ماعجان جۇمابايەۆتى ەسكە الىپ، تۇركىتىلدەس ەلدەر اراسىندا كەڭىنەن ناسيحاتتاۋعا ارنالعان ءىس-شارا 19-شى اقپان كۇنى انكارا قالاسىندا جالعاسادى. ال 21 ناۋرىز كۇنى «كاستامونۋ – تۇركى الەمىنىڭ مادەني استاناسى» جىلىنىڭ سالتاناتتى اشىلۋى وتەدى.